ព្រះរាជាណាចក្រកម្ពុជា
ជាតិ សាសនា ព្រះមហាក្សត្រ
សេចក្តីថ្លែងអំណរគុណ
ខ្ញុំព្រះករុណាខ្ញុំ ព្រមទាំងក្រុមគ្រួសារ មានកិត្តិយសសូមសំដែងនូវអំណរព្រះគុណចំពោះព្រះតេជគុណ វ៉ង គឹមសន ព្រះចៅអធិការវត្តជម្ពូវន្ត និងសូមថ្លែងនូវអំណរគុណយ៉ាងជ្រាលជ្រៅបំផុត ជូនចំពោះឯកឧត្តម លោក លោកស្រី និងបងប្អូនមិត្តភក្តិរួមថ្នាក់សុក្រឹតការបន្ទប់ព្រះវិហារទាំងអស់ ដែលបានចូលរួមរំលែកទុក្ខជាមួយក្រុមគ្រួសាររបស់ខ្ញុំព្រះករុណាខ្ញុំ ក្នុងកំឡុងពេលដែលលោកតារបស់ខ្ញុំព្រះករុណាខ្ញុំ លីម ប៊ុងងី ហៅ លីម ស៊ីមងី (តាឧត្តុង) បានទទួលមរណៈភាពកាលពីថ្ងៃទី០៥ ខែឧសភា ឆ្នាំ២០១៣ រហូតមកដល់ថ្ងៃរៀបចំប្រារព្ធបុណ្យខួបគម្រប់៤៩ ថ្ងៃ (១០០ ថ្ងៃ) នាពេលនេះប្រកបដោយទឹកចិត្តជ្រះថ្លា និងស្មោះសរជា ទីបំផុត។
កាយវិការដ៏ប្រពៃនេះ បានឆ្លុះបញ្ចាំងឱ្យឃើញពីការសាមគ្គីគ្នា ជួយគ្នា និងលើកទឹកចិត្តគ្នានៅពេល មានទុក្ខ ឬបញ្ហាលំបាកអ្វីកើតឡើង ដើម្បីជួយផ្តល់នូវកំលាំងចិត្ត និងជួយរំលែកការលំបាកមួយចំនួនដល់មិត្តភក្តិ បងប្អូនរបស់យើងគ្រប់ពេល ដូចដែលយើងបានធ្វើកន្លងមកជាបន្តបន្ទាប់។
ក្នុងនាមក្រុមគ្រួសារ ខ្ញុំព្រះករុណាខ្ញុំ សូមថ្លែងនូវអំណរព្រះគុណ និងអរគុណជាថ្មីម្តងទៀត ចំពោះ ព្រះតេជគុណ ឯកឧត្តម លោក លោកស្រី និងបងប្អូនមិត្តភក្តិរួមថ្នាក់ទាំងអស់ និងសូមព្រះតេជគុណ និងឯកឧត្តម លោក លោកស្រី និងមិត្តភក្តិ សូមឱ្យទទួលបាននូវ មគ្គផលដែលបានសាងនេះ សូមឱ្យសំរេចបានចបំណងនូវអ្វីៗ ដែលប៉ងប្រាថ្នា ជាពិសេសសូមជួបតែនឹងពុទ្ធពរទាំង ៤ ប្រការ គឺអាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ និងសូមឱ្យសកម្មភាពដ៏ថ្លៃថ្លា នេះក្លាយជាសកម្មភាពមនុស្សធម៌ និងការរួបរួមគ្នា សាមគ្គីគ្នា ឯកភាពគ្នាតរៀងទៅ។
សូមព្រះតេជគុណ ឯកឧត្តម លោក លោកស្រី និងមិត្តភក្តិរួមជំនាន់ទាំងអស់ មេត្តាទទួលនូវការគោរពស្រឡាញ់ និងរាប់អានដ៏ស្មោះស្ម័គ្រពីខ្ញុំព្រះករុណា ខ្ញុំ។
រាជធានីភ្នំពេញ ថ្ងៃទី២០ ខែមិថុនា ឆ្នាំ២០១៣
ដោយការគោរព ស្រឡាញ់ រាប់អានដ៏ជ្រាលជ្រៅ !
ឧត្តមសេនីយត្រី.ងី សុវណ្ណ
No comments:
Post a Comment